LAOAG CITY – Inbatad ti National Bureau of Investigation a saanda nga ipaayan ni Vice President Sara Duterte ti listaan dagiti salsaludsuden da kenkuana iti baet ti imbestigasyon mainaig iti nagbalin a rakurak na kontra ken ni Presidente Ferdinand ‘Bongbong’ Marcos Jr.
Segun ken ni National Bureau of Investigation Director Jaime Santiago, umuna a saludsuden da ken ni Duterte maipanggep iti tao a dinakamat na a kinontrata na tapno patayen ni Presidente Marcos no agballigi ti maysa a plano kontra kenkuana, kasta pay ti pangta iti biagna.
Maipalagip a sumango koma ni Duterte iti National Bureau of Investigation idi Nobyembre 29 tapno ilawlawag na ti nagbalin a rakurak na nga ipapatay na da Marcos, First Lady Liza Araneta Marcos, ken Speaker Ferdinand Martin Romualdez no mapatay da daytoy.
Nupay kasta, kiniddaw ti kampo ti Bise Presidente iti National Bureau of Investigation a balbaliwan da ti panagdengngeg ken nai-schedule daytoy intono Disyembre 11 tapno maipaayan ti ad-ado nga oras nga agsagana.
Kiniddaw pay ni Duterte iti National Bureau of Investigation nga ikkan da ti nalawlawag a kopya ti reklamo kontra kenkuana ken dadduma pay a dokumento a namonganayan iti imbestigasyon, karaman ti listaan dagiti saludsud a plano a saludsuden kenkuana ti ahensya.
Segun ken ni Santiago, ti koordinasyon ti Bise Presidente iti imbestigasyon ket makatulong iti National Bureau of Investigation a makaala ti nayun nga impormasyon maipanggep kadagiti maipagarop a pangta kenkuana ken ni Marcos, nga agpada a prot-protehiran ti ahensya.
