LAOAG CITY – Inpakaammo ni Atty. Charito Malicad, mangidadaulo ti City Tourism Office ditoy siudad ti Laoag nga addan ti pammalubos ti National Commission for Culture and the Arts wenno NCCA iti pannakatarimaan ti Gabu Watch Tower ditoy siudad ti Laoag.
Segun kenkuana, mabalinen nga ipatungpal dagiti inrekomendar ti City Engineering Office iti naan-anay a pannakatarimaan iti sumagmamano a paset ti Gabu Watch Tower.
Inbatadna nga itay laeng kallabes ket simmungbaten ti National Commission for Culture and the Arts iti suratda a mangipalpalubos a mabalin daytoy a matarimaanen.
Nupay kasta, inlawlawagna a maiyur-uray laengen ti pinal no kasano a rugianan daytoy babaen ti koordinasion ti Local Chief Executive, City Engineering Office ken iti barangay.
Kunana nga adda ti maysa a milyon a pisos a pundo para iti rehabilitation kadagiti cultural properties ditoy siudad ti Laoag.
Innayonna a daytoy a pundo ket saanna a kayat a saoen a mausar amin gapu ta mabalin a sobra ngem nakadepende no mano amin ti magastos.
Maipalagip a nangipatulod ti report inspection ti lokal a gobierno ditoy siudad ti Laoag maipanggep iti pannakadadael iti sumagmamano a paset ti Gabu Watch Tower gapu iti napasamak a gingined idi bulan ti Enero ita a tawen.
