LAOAG CITY – Inpakaammo ni Atty. Charito Malicad, ti mangidadaulo iti City Tourism Office ditoy ciudad ti Laoag nga addan ti nagbalin a sungbat ti National Commission for Culture and the Arts iti inpatulod da a surat seknan ti problema iti Gabu Watch Tower.
Segun kenkuana, ti nagbalin a sungbat ti ahensia ket inturnover da iti technical staff ti nasao a banag ken nagsurat met ti technical staff iti biang ti Tourism Office.
Inbatad na a kiniddaw da ti nayon a detalye no ania ti rumbeng a maaramid iti nasao a lugar.
Kunana nga inyuman da metten daytoy iti biang ti City Engineering Office tapno maipinal no ania dagiti rumbeng a maisimpa wenno maurnus.
Maipalagip a kumarkaron ti perdision iti watch tower kalpasan ti naudi a napigsa a gingined a napasaran ditoy ciudad a nagrikkian ken nakabuongan payen dagiti sumagmamano a partes na.
