LAOAG CITY – Iti panaglukat ti Palarong Pambansa 2025, insigida nga immarangkada ti National Capital Region kalpasan a nakagun-od ti Top 1 spot iti umuna nga aldaw ti kompetision.
Dumanon iti 13 a balitok a medalya ti nagun-od ti National Capital Region manipud kadagiti nagduduma a tay-ak ti isports kas ti gymnastics (secondary ken elementary boys), athletics (400m run elementary boys ken secondary girls), table tennis (secondary boys ken girls), chess (elementary ken secondary boys, individual ken team category iti secondary girls), discus throw (elementary ken
secondary girls), 100m hurdles (secondary girls) ken camel horse (elementary boys).
Malaksid iti daytoy, nakagun-od met ti rehion ti walo a silver ken tallo a bronze medals.
Mainaig iti daytoy, segun ni Dr. Connie Gepanayao, maysa kadagiti Coach ti National Capital Region, naragsak daytoy iti agdama nga standing ti National Capital Region no sadinno a mangnamnama isuna a makagun-odda pay ti nayon a balitok a medalya manipud iti basketball, gymnastics, volleyball ken dadduma pay nga sports events kadagiti sumarsaruno nga aldaw.
Adda met iti maikadua a puesto ti CALABARZON Region nga addaan ti 11 a gold, 9 a silver ken 6 a bronze idinto nga adda iti maikatlo a puesto ti Western Visayas nga addaan ti 6 a gold, 5 a silver ken 3 bronze.
Agtultuloy ti laban ken namnama ti National Capital Region a mapagtalinaed ti puestoda tapno magun-od ti ika-18 a kampeonatoda iti pakasaritaan ti Palarong Pambansa.
