LAOAG CITY – Nagballigi ti National Capital Region iti basketball – secondary girls kontra iti Davao Region iti iskor a 78-42.
Segun iti head coach ti National Capital Region a ni Camilla Denise Acosta, napalaos ti kinaragsakda gapu ta amin a sakripisio, training ken bannog dagiti ubbing ket nasuktan ti balligi.
Inbatadna a saan a nagbalin a nalaka dagiti atleta a nakabinnalubalda gapu ta nalalaing met dagitoy.
Kunana a saanda a ninamnama ti resulta ngem kuna ni Coach Acosta a ti ultimate goal-da ket agbalin a back-to-back champion.
Malaksid iti balligi iti Palarong Pambansa, agsagsagana metten ti koponan ti NCR nga agbiahe nga agturong idiay Singapore para iti NBA Rising Star Invitational.
Inburay ti Team Captain a ni Aubrey Lapasaran ti kinaragsakna no sadinno a kunana a ti panagkaykaysa ken naiget a komunikasion kas maysa a team ket maysa kadagiti nagbalin a tulbek iti panagballigida.
