LAOAG CITY – Daydayawen ken pagyamanan ti delegasyon ti National Capital Region (NCR) ti naurnus ken naimballigian a panaghost ti Ilocos Norte iti Palarong Pambansa 2025.
Segun ken ni Dr. Joel T. Torrecampo, Concurrent Officer-in-Charge ti Office of the Assistant Regional Director, nakakaskasdaaw ti pakabuklan ti organisasyon ti Palarong Pambansa ita a tawen.
Kuna na a ti pananglukat a programa ket umasping iti Olympic-type opening ceremony a namaris, patriotic ken napnuan ti emosyon.
Inbatad na a napintas ken naorganisar a naimbag ti panaghost ti Ilocos Norte, saan laeng a kadagiti paay-ayam no di ket uray kadagiti billeting areas.
Nagyamanan na met ti Ilocos Norte National High School, a nagtalinaeda ti sibubukel a delegasyon ti National Capital Region kagiddan ti panangdayaw na ti liderato ti pagadalan kangrunaan na ken ni Principal Jerry Carreon, ken ni Dr. Jon Corpuz, Schools Division Superintendent ti Laoag City, iti nabara a panangawat da kadakuada ken panangipaay da ti komportable nga akomodasyon.
Dinayaw pay ni Dr. Torrecampo dagiti ahensya a timmulong, karaman ti Philippine National Police (PNP) ken Bureau of Fire Protection (BFP), kasta pay dagiti miyembro ti lokal a komunidad a timmulong a nagdalos ken nangipasigurado ti kinaurnus ti pagadalan.
Kabayatanna, inrakurak ni Dr. Torrecampo nga iyalud-od ti National Capital Region ti panagtalinaed da iti Ilocos Norte agingga iti Hunyo 3 gapu ta fully booked aminen dagiti biyahe nga agturong idiay Maynila.
Inawagan pay ni Dr. Torrecampo ti Ilocos Norte a maysa a pudno a naindaklan nga host ti Palarong Pambansa 2025.
