LAOAG CITY – Mangiwaras ti National Capital Region Police Office (NCRPO) ti sumurok 1,000 a kapulisan inton aldaw ti Biernes, Septiembre 12 iti manamnama a pannakaiwayat ti tignay protesta nga adda ti pakainaiganna iti maanomalya a flood control projects.
Inbatad ni National Capital Region Police Office spokesperson Police Maj. Hazel Asilo, adda ti 1,250 a kapulisan ti mai-deploy kadagiti kangrunaan a lugar a pakaiwayatan ti tignay protesta.
Naammoan a ti sumagmamano a lugar a maapektaran ket ti Mendiola, dagiti opisina ti Department of Public Works and Highways (DPWH), Senado ken House of Representatives.
Adda pay ti nakabantay a 1,300 a kapulisan nga agserbi kas backup no kasapulan.
Innayon ni Asilo nga adda ti uppat a grupo a nangibaga a mangiwayatda ti Black Friday Protest kas panangkondenar kadagiti mapaspasamak a korapsion ditoy pagilian.
