LAOAG CITY – Inlawlawag ti National Economic Development Authority nga ad-ado a Pilipino ti mangikonkonsiderar iti bagida a marigrigat gapu iti inflation.
Inyarig ni National Economic Development Authority Secretary Arsenio Balisacan ti panagngato ti bilang dagiti Pilipino a nangikonsiderar a marigrigat da iti maikatlo a kwarter ita a tawen gapu iti inflation kangrunaan na iti essential commodities.
Inkalintegan ti sekretaryo a ti nagsasaruno a kalamidad ket nakaapektar kadagiti pamilya a saan a makasabay iti ngumatngato a presyo dagiti magatgatang.
Inbatad pay ni Balisacan a naobserbaran da a ti inparuk-at a baro a survey manipod iti Social Weather Stations idi Setyembre ket naiyuswat kalpasan ti nagsasaruno a bagyo a timmama iti pgilyan a nakaapektar iti presyo dagiti makan ken direkta a nakaapektar kadagiti marigrigat a pamilya.
Iti nasao a survey, rumrumuar a 48% ti pamilya a Pilipino ti mangibilang iti bagida kas marigrigat no sadinno a ngimmato manipod iti 12.5 million idi Hunyo ket nagbalin a 13.2 million idi Steyembre ita a tawen.
Kabayatanna, inpasingked ti National Economic Development Authority chief nga agtalinaed a nakatutok ti gobierno iti panagbaba ti bilang dagiti marigrigat a Pilipino iti 9% iti panagngudo ti termino ni Presidente Ferdinand Marcos Jr. idi 2028 iti babaen ti nagduduma nga istratehiya ken whole-of-society approach.
Karaman ditoy ti pannakaipatungpal ti Food Stamp prograam, pannakaikkat ti pass-through fees kadagiti lugan nga agibiyahe kadagiti makan ken agibunong ti tulong pinansyal a target na dagiti marigrigat nga indibidwal ken panangiprayoridad ti pannakaparnuay ti de kalidad a trabaho nga epektibo a wagas tapno makissayan ti kinarigat iti pagilyan.
