LAOAG CITY – Inlawlawag ni Police Lt. Floro Cosning Jr., ti chief of police ti PNP-Dumalneg nga agtultuloy ti panangbirok da iti negatibo nga antigen test result dagiti sumrek iti ili da.
Segun kenni Cosning, daytoy ket tapno masigurado a dagiti sumrek iti ili ket saan a carrier ti covid-19 ken epektibo met daytoy iti pananglaban da iti covid-19.
Inbatad na a dagiti residente iti ili ti Dumalneg nga addaan ti nasken nga aramiden iti ruar ti ili ket mapalubusan latta a rumuar ken no agsubli da ket nasken a saan da pay laeng nga agruruar.
Kunana pay a dagiti APOR ket masapol a dumalan iti antigen test iti kada lawas.
Mainaig iti daytoy, kuna ni Cosning a dagiti agideliver met iti ili da ket addaan met dagiti negatibo a RT-PCR test ken aktibo pay dagiti opisyal ti barangay ken dagiti PNP a mangmonitor iti pagturungan dagitoy tapno masigurado nga awan ti kapulapol da nga ado a tattao.
