LAOAG CITY – Inpakaammo ni PMaj. Joseph Tayaban, Hepe ti Philippine National Police iti ili ti Badoc a negatibo ti resulta ti Search Operation iti pagtaengan ti maysa nga agdama a Sangguniang Bayan Member ti nasao nga ili, iti Brgy. Lacuben iti ili ti Badoc.
Segun kenkni Tayaban, daytoy ket kalpasan nga awan ti nabirukan dagiti otoridad kabayatan ti panagsukimat dagitoy iti uneg ti balay ti opisial ti ili.
Inbatadna a dagiti binirok dagiti pulis a napusgan a sumrek iti pagtaengan ti agpanpanday linteg ket ti caliber 45, m16 rifle ken dagiti balbala dagitoy a paltog.
Inlawlawagna a naisayangkatan ti opisial kalpasan nga adda ti naawatda a report manipod iti maysa a concern citizen a maipagarup nga agpappaputok ti paltog ti konsehal.
Nupay kasta, kunana nga awan met pay dagiti posible a nagbalin a biktima iti naiwawa a bala ngem masapol a malapdan daytoy nga aramid tapno maliklikan nga adda dagiti madangran iti insidente.
Immun-una ngem iti daytoy, kuna ni PMaj. Tayaban a naiparuk-at ti Search Warrant nga inyisyu ni Hon. Judge ti RTC Bauang, La Union, RTC Branch 33 a napetsaan idi Nobiembre 22, 2022 babaen iti nagtitipon a pwersa ti PIU/PDEU ken Badoc Municipal Police Station.
