LAOAG CITY – Natiliw ti maysa a negosyante kalpasan a naglako maysa a litro ti gasolina a naipan iti maysa a litro a botelye ti softdrinks kadagiti otoridad iti Brgy. Calambeg, iti ili ti Piddig.
Binigbig ni Police Lieutenant Donaldson Pagalanan, deputy chief of police ti PNP Piddig, ti suspek a ni Rodrigo Alonzo y Bonilla Jr, agtawen ti 28, naasawaan ken akinkukua ti sari-sari store a nakaiwayatan ti buy bust operation.
Kuna na nga umabot iti 59 a litro ti gasolina a naipan iti dakkel a container, 11 a pidaso iti 1-liter a botelya ti softdrink nga addaan ti gasolina, ken ti maysa a litro a buybust item.
Inbunannag ni Pagalanan nga adda ti naipadanun kadakuada a report seknan iti panaglako ti suspek iti nakabotelya a premium gasoline iti nasao a barangay.
Inbatad na nga addan ti panagsita ti kapitan ti barangay ken adda ti panagsardeng da iti kallabes.
Basar iti palawag ti suspek kadagiti otoridad, maasian kadagiti kabarangayan na gapu ta adayo da iti sentro iti Piddig.
Nupay kasta, kuna ni Pagalanan nga iligal met ti wagas a panagtulong na tapno kadagiti kalugaran na.
Innayon na a possible a sanguen ti suspek ti Batas Pambansa bilang 33 a naamendaran babaen iti PD 1865 wenno iligal a panaglako dagiti produkto ti petrolyo.
Naamuan nga agbalur iti 50 a pisos iti kada litro ti panaglako ni Alonzo.
Nagpalagip ni Pagalanan a narisgu iti panagipondo ti gasolina gapu ta possible a mangitunda ti uram ken pannakaapektar dagiti ubbing gapu ti angot na.
