LAOAG CITY – Agtultuloy ti imbestigasyon ti Philippine National Police mainaig iti pannakapalto-paltog a poon ti nakatayan ti maysa a negosyante iti Sition 5, Brgy 47, Bengcag ditoy ciudad ti Laoag.
Nabigbig ti biktima a ni Antonio del Rosario Buted, agtawen ti 75, naasawaan, negosyante ken residente iti nadakamat a barangay.
Immuna iti daytoy, mabuya iti Closed-Circuit Television footage nga iti oras ti alas-5:48 idi malem, Disyembre 29, kabayatan ti panangdaldalos ni Buted ti lugan na iti arubayan da ket dimteng dagiti riding-in-tandem suspects ken bigla lattan a pinaltu-paltugan da ti biktima.
Nagtalapwagaw a dagus dagiti suspek kalpasan ti krimen idinto a ti biktima ket naitaray iti Governor Roque Ablan Senior Memorial Hospital ditoy ciudad ti Laoag ngem naideklarar a dead on arrival babaen ti attending physician a ni Dr. Roberto Labuntog.
Narekobre iti nakapasamakan ti krimen ti uppat a fired cartriged case ken mausa a deformed fired bullet.
Mainaig iti daytoy, inbatad ni Mrs. Lilian Velasco iti Brgy. Bengcag ditoy ciudad ti Laoag nga awan ti ammo da a rason ti nangpapatayan da iti manugang na gapu ta awan met ti nadakdakamat na a problema wenno pangta iti biagna.
Segun ken ni Velasco, ti asawa ken anak ti biktima ket adda da idiay Amerika.
Inyistorya ni Velasco a nakangngeg ti tallo a putok ti paltog ken likud laeng dagiti suspek ti nakita na.
Inpakaammo ni Velasco a ti negosyo ti biktima ket buy and sell ti lugan, ken dati nga agent ti National Bureau of Investigation (NBI).
Nagpanawagan ni Velasco kadagiti karruba da nga addaan ti Closed-Circuit Television footage nga ipalubos da koma a makita daytoy barbareng makatulong iti al-alisto a pannakasolbar ti kaso.
Nangipaay met ti mensahe ni Velasco kadagiti akin-aramid ti pannakapapatay ni Buted nga uray malusutan da ti inaramid da ket saanda pulos a makalusot iti Diyos.
