LAOAG CITY – Nagkamang ti maysa a negosyante iti PNP Laoag kalpasan a natakawan iti pagtaengan da iti Brgy. 16 ditoy ciudad ti Laoag.
Nabigbig ti biktima a ni Juanito Abad Buted, 59, naasawan, negosyante ken residente iti Brgy. 55B ditoy ciudad ti Laoag ken agdama nga agnanaed iti Brgy. 16 ditoy ciudad.
Basar iti imbestigasyon, nadiskubre ti biktima a mapukpukaw iti 42-inch Flat Screen TV nga agbalor iti 20 ribo a pisos ken Water Pump nga agbalor iti 16 ribo a pisos.
Patien ni Buted a ti caretaker ti balay na a ni Christian Quitolla Pua addaan iti umno nga edad, awanan asawa, tubo idiay Brgy. Cabatuan, Isabela ngem agdama nga agnanaed iti Brgy. 1 ditoy ciudad iti nangtakaw kadagiti nadakamat nga items.
Kunana a ni laeng Pua iti adda igigaman na a duplicate key ti balay.
Innayon na a sakbay iti insidente, nangted ti biktima iti kwarta iti suspek a paggatang ti bagas ken feeds ngem saan daytoy a nagsubsubli.
Narekobre dagiti otoridad iti maysa a screw driver a mapapati nga inusar ti suspek a panangikkat na iti TV.
Rumrumuar a posible nga adda dagiti kinakunsabo ti suspek a nagtakaw.
Iti agdama, agtultuloy iti imbestigasyon dagiti otoridad para iti pannakabirok ti suspek.
