LAOAG CITY – Natay ti maysa negosyante a nangiturong ti motorsiklo kalpasan a nakadinnungpar na ti maysa a puraw a Toyota Corolla nga inturong ti kameng ti Philippine Navy iti Manila North road bisinidad iti Barangay Baligat iti ciudad ti Batac.
Segun ken ni Police Lt. Col. Adrian Gayuchan, ti chief of police iti ciudad ti Batac, naamoan iti imbestigasyon da a ti biktima ket aggapo iti paggiinuman iti San Julian iti ciudad ti Batac gapu ta adda ti pasken da kadagiti barkada na.
Inlawlawag ni Gayuchan a rumrumuar a ti akinbasol iti napasamak a desgrasya ket ti metlaeng biktima gapu ta maipagarop nga immagaw ti linya.
Inpakaammo na a ti kameng ti Philippine Navy a nangiturong ti Toyota Corolla ket immay laeng nagbakasyon ngem isu metten ti pannakapasamak ti nasao nga insidente.
Innayon ni Gayuchan nga iyur-uray da ti panagsarita ti suspek ken ti pamilya ti biktima tapno maamoan no ania ti sumaruno nga addang da.
