LAOAG CITY – Inlawlawag ni PCapt. Joseph Tayaban, hepe ti PNP-Badoc ti pannakatiliw ti maysa a lalaki a nagusar ti peke resulta ti RT-PCR test.
Segun ken ni Tayaban, ti suspek ket maysa a negosyante a residente iti Brgy. 5 iti ili ti Vintar.
Kuna na a sumreken ditoy probinsya ti negosyante kalpasan a nagideliver ti lasona idiay Ilocos Sur.
Nu pay kasta, iti panangkita dagiti otoridad nga adda iti border checkpoint iti ili ti Badoc kadagiti dokumento na ket naduktalan a peke ti inpakita na nga RT-PCR test result.
Inbatad na a naipadanun a dagus kenkuana ti nasao nga isyu ket intawag na met iti Karmeli Hospital agsipod ta isu ti nakanagan a naggapwan ti resulta.
Inpakaamo ni Tayaban a nakumpirmaran na iti nasao nga ospital a peke ti antigen result gapu ta nakaimprinta daytoy iti long bond paper ken awan ti dry seal na.
Mainaig iti daytoy, kuna ni Tayaban a basar iti palawag ti negosyante ket adda ti pagayam na a nangilakad ti nasao nga antigen result nu sadino a saanan a dimmalan iti test ken binayadan na iti 1,000 a pisos.
Gapu iti daytoy, maisagsaganan ti maipila a kaso a panagsalungasing iti Article 172 iti Revised Penal Code wenno ti Falsification by private Individual and Use of Falsified Document ken RA 11332 wenno ti Mandatory Reporting of Notifiable Diseases and Health Events of Public health Concern Act kontra iti negosyante.
