LAOAG CITY – Nawaya-wayaanen ti negosyante nga inarestar dagiti otoridad gapu iti illegal a panaglaklako na kadagiti ginalon ken binotelya a gasolina iti Barangay 21 ditoy ciudad ti Laoag.
Nabigbig daytoy a ni Alden Ramos Oloraza, agtawen ti 29, baro, negosyante ken residente iti nadakamat a barangay.
Nawaya-wayaan ni Oloraza kalpasan a nakapagpiyansa ti innem a ribo a pisos.
Maipalagip a nakumpiskar iti balay ni Oloraza ti ado a ginalon ken binotelya a gasolina itay kallabes kalpasan a maysa a pulis ti nagpammarang a gumatang iti nasao a tagilako kalpasan a nakaawat ti PNP ti report nga adda ti aglaklako iti tingi tingi a gasolina iti nasao a barangay.
