LAOAG CITY – Masul-oy babaen ti angin ti napasamak nga Nerve agent attack
a nakasabidongan ti dati a Russian spy a ni Sergei Skripal ken ti balasang nga anak na iti maysa nga restaurant idiay siudad ti Salisbury, United Kingdom.
Daytoy ti inbatad ni Dr. Allan Taylan iti pannakiuman kenkuana ti Bombo Radyo Laoag.
Kuna na a no masul-oy ti nasao a kemikal ket dagus nga apektaran na ti respiratory system ti bagi ken sabsabali a paset ti bagi.
Segun kenni Taylan, posible a makontaminar ti sabsabali a banag iti aglawlaw ken iti kudil iti tao ti nasao a kemikal.
Inbatad na a nasken a maisolate ti nakapasamakan ti nerve agent attack kas iti insidente a nakasabidongan dagiti agama idiay United Kingdom.
Mainaig iti daytoy, inpakaammo ni Dr. Taylan nga adda ti mabalin nga antidote para kadagiti naapektaran ti nerve agent.
Daytoy ket tapno maagasan ti pannakaparalisa ti naapektaran a tao.
Kuna na a depende pay ti dosage ti kemikal a naiwaras iti maysa a lugar.
Nupay kasta inbatad ni Taylan nga agpukaw laeng ti nerve agent iti maysa a bulan wenno napapaot pay depende iti concentration ti nerve agent.
