LAOAG CITY – Inpakaammo ni Bombo International News Correspondent Savanna Pellazar a maysa a Nurse Attendant manipud idiay Bangkok, Thailand a karaman dagiti newborn babies dagiti naibakwit iti pagtrabtrabahoanna iti maysa a pribado nga ospital idiay Thailand kalpasan ti massive earthquake.
Segun kenkuana, idi nariknada ti napigsa a ginggined, imbes a ti bagbagida ti iyun-unada nga isalakan ket inpangpangrunada nga insigida nga inruar dagiti newborn babies iti ospital tapno maliklikan ti posible a dakes a mapasamak kadakuada.
Inbatadna a nagpaut ti agarup 15 a minuto ti ginggined nga arig ket agsalsala ti ospital a pagtrabtrabahoanna pakairamanan dagiti kaabayna nga agkakadakkel a pasdek.
Inlawlawagna a gapu iti buteng ken danagda nga adda pay dagiti sumaruno nga aftershock a mapasamak ket ad-adda a pinilida pay laeng a maturog iti simbaan ngem iti pagnanaedanda nga hotel.
Kunana nga half day ti trabahoda idi kalman gapu iti napigsa a ginggined ngem insigida met laeng a nagsubli ti normal a panagtrabahoda ita nga aldaw.
Innayonna nga iti baet ti insidente ket maibilang pay laeng a nagasat dagiti estudiante idiay Thailand gapu ta awan ti serrek kadagiti pagadalan kadagitoy a gundaway.
Naammoan nga adda iti maikawalo a kadsaaran ni Savanna idi manarimaan nga agginggined gapu ta napan nangitulod ti pasiente.
Kabayatanna, saan met unay a naapektaran ti serbisio ti kuriente ken internet access connection.
Iti agdama, agtultuloy ti rescue and retrieval operation kadagiti narpuog a pagtaengan ken pasdek gapu iti napigsa a gingginged.
Immuna iti daytoy, dinayyeg ti magnitude 7.7 a ginggined ti pagilian a Myanmar a nakatayan ti sumurok maysa a ribu nga indibidual ken nakasugatan ti sumurok dua a ribu a tattao.
