LAOAG CITY – Naragsak nga inpakaammo ni Engr. Jonathon Corpuz, branch manager iti National Food Authority, nga adda umdas a buffer stock ti bagas ditoy probinsia kalpasan iti iduduprak ti Bagyo Julian.
Segun kenkuana, adda ti 2,310 a sako ti bagas idinto nga adda ti 51,650 sako ti irik a nakasagana a mabayo no agkasapulan dagiti lokal a gobierno (LGU), tapnu iti napartak a pannakaidiaya ti bagas para kadagiti naapektaran ti Bagyo Julian ditoy probinsia.
Kinunana a nakagatangen ti lokal a gobierno iti ili ti Paoay, Currimao, ken Badoc iti bagas manipud iti National Food Authority, ken manamnama a gumatang iti lokal a gobierno iti ili ti Pagudpud ken Sarrat.
Segun ken ni Corpuz adda ti napirmaan a resolusion ti National Food Authority Council iti dua a klase ti presio ti bagas no sadinno a mailako ti rice stocks nga agpaut iti tallo a bulan iti P29 kada kilo, idinto a P38 kada kilo dagiti stocks nga awan pay tallo a bulan.
Inlawlawagna nga adda ti “Price Range Scheme” a maipatpatungpal, no sadinno nga inaprobaran ti NFA Council ti pannakaingato ti buying price ti bagas iti P23 agingga iti P30 kada kilo ti clean and dry nga irik, ken P17 agingga iti P23 kada kilo ti wet rice ket tapno makaaramid iti umdas a buffer stock.
Malaksid iti daytoy, adda met “fast lane” ti NFA para kadagiti mannalon nga aglako iti 50 a sako wenno nababbaba a bagas iti ahensia, ngem masapul latta nga isubmitirda dagiti kasapulan a dokumento.
Kabayatanna, inlawlawagna a saan a gumatang ti NFA iti bagas nga addaan iti discoloration, tapno masigurado ti kalidad dagiti bagas a maiwaras kas relief goods kadagiti umili.
