LAOAG CITY – Inpasingked ni Engr. Eleanor Andres, provincial manager iti National Food Authority (NFA) ditoy probinsya nga awan ti rumbeng a pagdanagan dagiti mannalon seknan iti Rice Tarrification Bill.
Inbatad na a kas iti kanayun nga irakrakurak ni Agriculture Secretary Emmanuel Piñol, dakkel ti maitulong ti nasao a paglintegan kadagiti mannalon ditoy probinsya.
Kuna na pay a saan a mabaybay-an dagiti mannalon ditoy pagilyan.
Maipalagip a ti kangrunaan a gagem ti Rice Tarrification Bill ket para iti food security wenno awan ti panagkurang dagiti buffer stock wenno suplay a bagas ditoy pagilyan.
Mamati met ni Andres a saan a bumaba ti paggatang iti NFA iti bagas a maapit dagiti mannalon uray adonton dagiti maangkat nga imported a bagas.
Nupay kasta, inadmitir na a dakkel a problema da ti nangato unay a presyo ti irik iti agdama.
