LAOAG CITY – Inpakaammo ni Sang. Panlalawigan Member Domingo Ambrocio, chairman ti Committee on Agriculture a ngimmato ti paggatang ti National Food Authority (NFA) iti kada kilo ti irik.
Segun kenni Ambrocio, karaman ni Gov. Matthew Marcos Manotoc kadagiti kangrunaan a naragsakan iti daytoy a banag kas maysa kadagiti naiget a mangkitkita iti pagimbagan dagiti mannalon ditoy probinsya.
Inbatad na a manipud iti 13 a pisos iti kada kilo a problema dagiti mannalon itay kallabes ket nagbalinen a 19 a pisos iti kada kilo ti nabilag a nalaing nga irik.
Kuna na a daytoy ti inpakammo kenkuana ni Engr. Eleonor Andres, ti General Manager ti NFA ditoy probinsya.
Nupay kasta, kuna ni Ambrocio nga ikarkararag na a ngumato pay ti presyo ti nasao a produkto dagiti mannalon.
Inlawlawag na a daytoy ket gapo ta no sumayaat ti panagbiag dagiti mannalon ket sigurado a mairaman dagiti dadduma pay a kailyan.
