LAOAG CITY – Ninayonanen ti National Food Authority ti rice buffer stock-da kas maiyalubbog iti direktiba ni Presidente Ferdinand Marcos Jr. a paigetan ti panaggatang ti irik manipud kadagiti mannalon.
Inbatad ni Palace Press Officer USec. Claire Castro, babaen iti daytoy ket masuportaran ti panagbiag dagiti mannalon ken maipasigurado ti suplay ti bagas ditoy Pilipinas.
Kunana nga iti kaudian a datos ti National Food Authority, adda ti 10.1 million a sako ti irik idinto nga adda ti 1.2 million met ti nakapenpen a sako ti bagas.
Inlawlawagna a ti nasao a bilang para iti sangapulo nga aldaw a konsumo iti intero a pagilian.
Innayon ti opisial a daytoyen ti kangatoan nga imbentario ti National Food Authority sipod pay idi tawen 2020.
Immunan nga inrakurak ti National Food Authority nga adda pay ti nabatbati a PhP12 billion para iti agtultuloy a panaggatang ti irik ita a summer harvest.
