LAOAG CITY – Mamati ni National Irrigation Administration Administrator Eddie Guillen a pammerperdi laeng kenkuana ti isyu mainaig iti transfer of ownership ti $1.2-M a pagtaengan ti anakna a ni Claveria Cagayan Mayor Lucille Angelus “LA” Guillen idiay Las Vegas, Nevada, United States of America.
Segun kenkuana, amin a gumatgatang ti pagtaengan idiay Estados Unidos ket babaen iti Limited Liability Company.
Inbatadna nga awan ti dakesna ti gumatang iti pagtaengan basta dimmalan daytoy iti umno a proseso.
Inlawlawagna a sakbay pay a simrek ti pamiliada iti lubong ti pulitika ket addan dagiti nagduduma a negosio ken pamastrekda tapno makagatang ti nasao a gatad ti balay idiay Amerika.
Malaksid iti daytoy, kunana nga adda ti maysa a news agency nga inakusaran isuna nga adda ti sanikuana a saanna nga indeklarar iti Statement of Assets, Liabilities and Net Worth wenno SALN ngem inbabawida met laeng daytoy iti mabiit.
Basar iti nasao a news agency, maipagarup a gimmatang ti anak ni Guillen ti five-bedroom ken five-bathroom estate idi Mayo 2025 iti balor a $1.265 million wenno katukad ti agarup P70 million.
Mainaig iti daytoy, nailanad iti report a maipagarup nga inyakar ni Guillen ti sanikua iti Southern Highland Limited – Limited Liability Company nga awan ti gastosna idi Setiembre 21, 2025, maysa a bulan kalpasan a nangrugi a nangiwayat ti gobierno ditoy Pilipinas ti imbestigasion mainaig kadagiti maanomalya a flood control ken dadduma pay nga infrastructure projects.
