LAOAG CITY – Inpasigurado ni Engr. Rommel Batuac, ti chief operator iti National Irrigation Administration (NIA) nga in-inuten a masolsolbar dagiti problema dagiti mannalon kangrunaan na dagiti masakupan ti Bongga Pump 2 iti ili ti San Nicolas.
Kuna na nga addan ti panagsasarita dagiti maseknan a mannalon ken dagiti operators tapno maiyalisto ti panagaramid da ti pilot channel ti Bongga Pump 2 iti nadakamat nga ili.
Inlawlawag ni Batuac a gapu ta agkurkurang ti equipments dagiti quarry operators ket nagkari da a mangipaay da laengen ti krudo para iti panagaramid ti pilot channel ti Boangga Pump 2.
Mainag iti daytoy, kuna ni Batuac nga adda ti uppat nga heavy equipments nga inusar da tapno maabbengan ti Irrigators Association ti danom a maiserrek iti intake ti bongga pump 2 tapno masuplayan ti danom dagiti kataltalunan ken makaraep metten dagiti mannalon iti nadakamat nga ili.
Innayon na nga adda ti inbati da a maysa nga heavy equipment nga usaren dagiti maseknan a mannalon no kasapulan da.
Inadmitir ni Batuac a naladaw ti pannakaiserrek ti danom kadagiti kataltalunan ngem kuna na a napinpintas laengen daytoy ngem ti saan pulosen a nakatalon dagiti mannalon.
