LAOAG CITY – Kalikagum ti National Irrigation Administration a mapagsasaritaan a naimbag ti arungaing dagiti mannalon iti ili ti Nueva Era ken Banna.
Segun ken ni Engr. Rommel Batuac, Chief Operation ti National Irrigation Administration, daytoy ket babaen iti napintas a panagtutulag tapno maliklikan nga adda dagiti saan a panagkikinnaawatan dagiti mannalon.
Inbatadna a masapul a maipatungpal no aniaman ti katulagan dagiti nagduduma a zanjera dagiti mannalon tapno maiwaras ti danum kadagiti kataltalonanda.
Inlawlawagna a ti watershed ti Papa River Irrigation System ket maibilang a saan nga “healthy” wenno bumasbassit ti danum kadagiti ubbog.
Kunana a kasapulan nga agatendar dagiti maseknan a mannalon no adda ti maisayangkat a taripnong tapno ditoy a mapagsasaritaan no aniaman ti problema dagitoy.
Mangnamnama ni Batuac a masolbar daytoy a parikot dagiti mannalon iti kabiitan a panawen nangruna ket agkasapulan ti amin ti pagpadanum iti taltalon.
Maipalagip a maproblemaan dagiti sumagmamano a mannalon iti ili ti Nueva Era kalpasan a na-welding ti pangalaanda ti danum.
Immuna iti daytoy, maladingitan unay ni Barangay Chairman Jondie Bayudan, ABC President iti ili ti Nueva Era gapu ta awan metten ti pangalaanda ti danum a pangsibog kadagiti mulada a mais ken nagduduma pay a produkto agrikultura kadagiti kataltalonanda iti Barangay Sto. Niño iti nasao nga ili.
