LAOAG CITY – Maysa a Nigerian model ti nakaawat ti Guinness World Record kalpasan a nagun-odna ti titulo a “Longest distance walked on a catwalk by a model” iti 125.11 km a pannagna iti entablado.
Ti distansia a pinagna ni Ololade ket katukad ti panagpagna manipud idiay Quezon City agingga idiay Tarlac.
Daytoy ket saan laeng iti pananggun-od ti Guinness World Record, daytoy ket maysa pay a runway show nga addaan ti nauneg a gagem.
Kadua ni Ololade iti entablado dagiti nagduduma a modelo pakairamanan ti addaan ti albinism, vitiligo, tribal marks ken plus-size models tapno agpakita ti diversity ken ipanawagan ti panangakseptar iti bukud a bagi.
Inbatad ni Ololade, kalikagumna a mangbukel ti runway no sadinno nga agpapada ti amin a rupa ken bagida.
Daytoy nga ideya ket namunganay iti maysa a personal a kapadasan a naminsan nga inbagada kenkuana iti maysa nga audition a saan nga umdas ti height-na wenno katayagna tapno agbalin a modelo.
Iti baet ti nadagsen a pannubok kas ti sugat iti saka, bannog ken masakit ket saan daytoy a simmuko.
Marikna ni Ololade ti balligi kalpasan ti amin a pannubok. Para kenkuana, ti Guinness World Records title a naawatna ket maysa a pammaneknek a ti arapaap ket agbalin a realidad basta may laketdi adda ti anus, pasensia ken pammati ti bagi.
