LAOAG CITY – Maysa a talk show host idiay Nigeria ti nakairekord ti world record gapu iti nasurok dua nga aldaw nga awan ti sardengna a naginterbyu kadagiti guests iti programa daytoy.
Kinumpirmaran ti records keeping organization a Guinness World Records a ti Nigerian social media influencer a ni Clara Chizoba Kronborg ti baro a world record holder ti titulo a “Longest Interviewing Marathon.”
Daytoy ket kalpasan a nakaaramid ti talk show marathon no sadino nagtultuloy a nakainterbyu ti 90 a tattao iti uneg ti 55 nga oras ken 24 a segundo.
Naisayangkat ti record breaking attempt ni Kronborg iti uneg ti barko a nakasanglad idiay Marbella, Spain.
Sumagmamano kadagiti guests ni Kronborg iti talk show marathon ket dagiti pulitiko, business owners, actors, real estate agents ken dagiti tattao a nagduduma ti nasionalidad ken background dagitoy.
Saan a nagbalin nga alisto ken Kronborg ti talk show marathon gapu ta iti katengangaan pay laeng daytoy ket agpaparawen ti timekna.
Gapu iti daytoy, namin-adu daras daytoy nga umin-inom ti danu a nangitunda met ti masansan a panagisbona ngem tapno saan a maapektaran ti panagisbona ket nagsuot ti adult diapers ni Kronborg.
Idi makadanonen iti 55 nga oras ni Kronborg ket kinumpirmaren ti Guinness a na-break daytoyen ti previous record no sadino saan daytoy a mamati nga iggemnan ti world record title a “Longest Interviewing Marathon” gapu ta awan idi ti pammatina a magun-odna ti nasao a rekord.
Kuna ni Kronborg, imposible laeng dagiti arapaap no saan pulos daytoy a pinadas.
