LAOAG CITY – Nagmulta ni Barangay Kagawad Cesario Pascual iti Barangay Sta. Maria ditoy ciudad ti Laoag kalpasan ti panangi-tap na ti kuryente para ti maysa a kubu-lubo ken dagiti street lights ti nasao a barangay.
Inlawlawag na nga inaramid na daytoy para ti pagsayaatan ti sibubukel a barangay da gapu ta idi awan pay silaw dagiti street lights ti barangay da ket ado dagiti mataktakaw kangrunaan na dagiti mausar nga agtalon ken uray dagiti dingwen.
Kuna na pay a sakbay nga intap na ti kuryente ket kinasarita na dagiti sumagmamano a kabarangay da ken inpakada na ti maysa kadagiti inhinyero ti INEC a ni engr. Burgos.
Inkalintegan na pay a kadwa na met laeng dagiti sumagmamano a kabarangayan na a nangipatakder ti poste a nakaikabilan dagiti street lights ti barangay da.
Innayon na nga inbilin na pay ti sekretaryo ti barangay da nga agaramid ti surat a maiturong iti gobierno ti ciudad ti Laoag seknan ti daytoy a banag ngem saanna nga ammo no naisumitir.
Naamoan nga umabot ti 6,648 a pisos ti pinagbayad ni Pascual no sadinno a karaman ditoyen ti electric consumption ken penalty na.
Kabayatanna, inbatad na nga iyur-uray na a sumangpet ni Mayor Chevylle Fariñas tapno mapan agpadespensar ti inaramid na ken no patawan ti memorandum ti mayor ket nakasagana met a mangsungbat.
NI Barangay Kagawad Cesario Pascual ti number 1 a barangay kagawad iti nasao a barangay.
