LAOAG CITY – Natiliw ti No. 10 Most Wanted Person ditoy probinsya ken maika-22 iti listaan ti Provincial Anti-Partisan Armed Group and Dangerous Drug Council wenno PAPAGDDC babaen ti nagtitipon a pwersa ti PNP-Badoc,INPPO PIU, INPPO Swat, 2nd PMFC ken RMFB iti Brgy.Sta Cruz Norte iti ili ti Badoc.
Daytoy ti inbatad ni Police Capt. Joseph Tayaban, ti chief of police iti ili ti Badoc.
Binigbig ni Tayaban ti akusado a ni Ricardo Cajimat y Balgos alyas Tomas, addaan iti umno a tawen, naasawaan, dati a kameng ti Philippine Army ken resident iti nadakamat a barangay.
Inbaga na a ti suspek ket natiliw babaen ti bileg ti warrant of arrest nga inparuk-at ni Hon Judge Angelo Albano, Presiding Judge iti RTC branch 17 iti ciudad ti Batac gapu iti kaso na a murder ken awan ti nairekomendar a piyansa na.
Maipalagip a nangiparuk-at ti Provincial Anti-Partisan Armed Group and Dangerous Drug Council wenno PAPAGDDC ti gunguna a 20 ribo a pisos para iti siasinnoman a makaibaga ti paglemlemmengan ti nasao nga akusado.
Namonganay ti kaso ni Cajimat iti panangpaltog na iti dua a fish vendor a taga Sinait idiay Sta. Cruz Norte iti ili ti Badoc idi 2007 no sadinno a pimmusay ti maysa a biktima.
Naamoan a ti nasao nga akusado ket nag-AWOL wenno Absent Without Leave iti Philippine Army.
