LAOAG CITY – Inistorya ni Mr. Rodolfo Layugan iti Barangay Elizabeth, Marcos, Ilocos Norte dagiti nagbalin a kapadasan na, makaturpos laeng dagiti uppat nga annak na.
Iti interview ti Bombo Radyo Laoag ken ni Layugan iti programa a Good Morning Philippines kas paset ti selebrasyon ti Father’s day, inbatad na a daytoy ket maysa laeng a driver ti pampasahero a jeep nga addaan ti rota a Laoag-Marcos-Ragas idinto a ti asawa na ket aglaklako ti street foods.
Inlawlawag na a gapu ti kinarigat ti panagbiag ket adda idi ti gundaway a kayat na a pagsardengen dagiti annak na iti panagadal da ti kolehiyo ngem saan nga immannugot dagitoy.
Kuna na a gapu ta pursigido ti inauna nga anak na a ni Mr. Christian Joy Layugan a makaturpos iti kolehiyo ket nagtrabaho kabayatan ti panagadal na agingga a nagturpos.
Maragsakan ni Layugan gapu ta kalpasan a nakaturpos ti inauna nga anak na iti kolehiyo ket napagasatan a nakastrek a dagus ti trabaho ken isun ti nagbalin a katulungan da iti panagbasa dagiti tallo nga inaudi a kakabsat na.
Innayon na a simmaruno a nagadal ti kolehiyo dagiti tallo nga annak na ken babaen ti tulong dagiti sumagmamano a kabagyan da ken ti panagbalin dagiti dua nga scholarship ket nagun-od da ti arapaap da.
Naamoan a tallo kadagiti annak ni Mr. Rodolfo Layugan ket nagturpos ti edukasyon idinto a ti maysa ket nurse.
Ti inauna a ni Christian Joy ket agdama a mangisuro iti Marcos Central Elementary School iti ili ti Marcos.
Kabayatanna, inbalakad ti ama a Layugan kadagiti nagannak a masapol a suportaran da dagiti annak da nga agadal gapu ta daytoy ket saan a mapukaw.
Mangnamnama ti ama a Layugan nga agbalin nga inspirasyon kadagiti dadduma a nagannak ti nagbalin a kapadasan na ken ti pakasaritaan ti pamilya da.
Inpalagip manen ti Mr. Rodolfo Layugan ti pagsasao a no adda ti rigat, namnamaen nga addanto met laeng ti panagnam-ay.
