LAOAG CITY – Inlawlawag ni Police Lt. Col. Rafael Lero, hepe ti PNP Laoag a kasapulan nga umuna nga agonline dagiti agala iti NBI clearance tapno adda ti maipakita dagiti maseknan iti border checkpoint nga adda ti napateg a gagem a sumrek ditoy siudad ti Laoag.
Daytoy ket kalpasan nga adda dagiti nagsaludsod mainaig iti panagala ti dukomento seknan iti pannakaipatungpal ti MECQ ditoy siudad ita a malem.
Kuna na a nasken a maipakita iti proof iti border iti mismo met laeng nga aldaw ken no anya nga oras nga alaen ti clearance tapno mapalubusan a makastrek ditoy siudad.
Mainaig iti daytoy, inbatad ni Lero a matingiting da met kadagiti maseknan nga addaan ti appointment kadagiti ahensya ti gobyerno nga awanan iti online system sakbay a mapastrek ditoy siudad wenno maibati ti ID dagiti maseknan iti border checkpoint.
Kabayatanna, inrakurak ni Lero a nasken nga amin pasahero kadagiti pampubliko a lugan ket addaan da iti barangay pass slip.
Kuna na a daytoy ti inbaga da kadagiti mangidadaulo kadagiti terminal ditoy siudad a masapul a kitaen dagiti driver ti pass slip wenno mangipan da ti karatula a “No Barangay Pass Slip, No Travel”.
Inpetteng ni Lero a maipawil a makastrek dagiti pampubliko a lugan nga aggapu iti sabali nga ili wenno siudad.
Innayon na a maysa laeng ti mabalin a pasahero iti Tricycle, dua iti Taxi, 50 a porsiento manipud iti kapasidad ti mabalin a kargaen dagiti Jeep a pasahero ken nasken nga awan ti backride dagiti motorsiklo.
