LAOAG CITY – Dumanon iti sumurok innem a ribu a lugan ti natiliw ti Land Transportation Office iti umuna a 15 nga aldaw iti bulan ti Hunio kagiddan ti pannakapaiget ti ahensia iti pannakaipatungpal ti ‘No Registration, No Travel Policy’ iti pagilian.
Segun ken ni Land Transportation Office Chief Assistant Secretary Atty. Vigor Mendoza, agtultuloy a maisaysayangkat ti operasion tapno agserbi a ballaag kadagiti motorista nga iparehistro dagiti luganda.
Nagballaag pay daytoy kadakuada a mabalinda nga agmulta ken posible a ma-impound ti luganda no bilang matiliwda.
Basar iti datos ti ahensia, manipud idi Hunio 1-15, 2024 ket adda ti 6,064 ti natiliwda, dumanon iti 5,470 ti naikkanda ti violation tickets idinto a dumanon met iti 981 ti na-impound.
Iti agdama, agtultuloy ti panangipatungpal ti Land Transportation Office iti nasao a pagannurutan tapno maipasigurado ti kinatalged dagiti amin nga agiturturong ti lugan ken tapno maliklikan ti aniaman nga aberya iti kalsada.
