LAOAG CITY – Naiget a maipatpatungpal ti “No Smoking Policy” iti uneg ti compound iti Ilocos Norte Police Probinsyal Office (INPPO).
Daytoy ti inbatad ni Police Major Jephre Taccad, ti pannakangiwat iti Ilocos Norte Police Probinsyal Office.
Inpetteng ni Taccad nga uray ti panagusar laeng ti vape ket saan da nga ipalubos.
Inpalgak na a ti “No Smoking Policy” nga ipatpatungpal da ket saan laeng a para iti nailian a pulisya no di ket karaman pay dagiti sibilyan a mapan bumisita iti lugar.
Innayon na nga uray siasinno ti makita da nga agsigarilyo iti uneg ti compound ti Ilocos Norte Police Provincial Office, sibilyan man wenno personnel ti nailian a pulisya ket agpapada dagitoy a tiliwen da.
Kuna na a no personnel ti nailian a pulisya ti maduktalan da nga agsigsigarilyo iti uuneg ti compound ket saan da laeng a tiliwen no di ket mapatawan pay ti maiyannatop a pannusa kas ti isasango ti maseknan ti kaso administratibo.
Inpannakkel ni Taccad a ti Provincial Director ken amin nga staff iti Ilocos Norte Police Provincial Office ket awanen ti agsigsigarilyo isut gapuna a masapol a respetaren koma amin ti ipatpatungpal da a “No Smoking Policy”.
