LAOAG CITY – Inpakaammo ni Engr. Cynthia Iglesia, ti Chief Meteorological Officer ti Pagasa-DOST iti Laoag International Airport a ti North America ti makakita ti total solar eclipse ita nga aldaw, Abril 8.
Segun kenkuana, ti bulan ket aggargaraw ken agliklikos iti lubong ket maabbunganna ti raniag ti init no sadino ti nasao a paset ti Amerika ti pagpuligusanna.
Inbatadna a posible nga agpaut ti lima nga oras ti total eclipse a maimatangan ti naruay a tattao kangrunaanna kadagiti adda iti amianan ti Amerika.
Nupay kasta, kunana nga in-inut met laeng nga agpukaw ken agsubli ti dati a kasasaad ti init.
Mainaig iti daytoy, kuna ni Engr. Iglesia nga awan ti rumbeng a pagdanagan dagiti tattao gapu ta awan met ti dakes nga epektona ti total solar eclipse kadagiti tattao.
Inlawlawagna a bayat a kitkitaen dagiti tattao ti total solar eclipse ket ginutigotna nga agusar ti eyeglass tapno saan a mapurar ti mata.
Innayonna a ti sumaruno a total solar eclipse ket makita inton Agosto 23, 2044.
