LAOAG CITY – Nangipatulod ti surat ti North Main Canal Federated Irrigators Association Incorporated iti National Irrigation Administration.
Daytoy ket kalpasan a saan nga ipalubos dagiti opisial manipud iti Turn-out Servce Area Group iti paset ti Tambidao iti ili ti Bacarra agingga iti Turn-out Servce Area Group iti Carusipan iti ili ti Pasuquin a makikappeng ti Zanjera Baranban iti North Main Canal Federated Irrigators Association.
Nailanad iti surat dagiti sumagmamano a rason a sakaby a maaramid ti 150 a milyon a pisos a gatadna a concrete dam a naipasdek iti Alsem iti ili ti Vintar.
Mainaig iti daytoy, saan laeng a namindua a daras a nagsasarita ti nagbaetan ti National Irrigation Administration, North Main Canal Federated Irrigators Association, Zanjera Baranban ken ti pannakabagi ti gobierno lokal iti ili ti Vintar ken Bacarra.
Naipalaon iti surat nga inpetteng ti Zanjera Baranban iti saanda a pannakikappeng iti North Main Canal Federated Irrigators Association ken ti saanda a pannakasapol ti danom nga aggapu iti proyekto ken tulong ti National Irrigation Administartion.
Iti agdama, saan pay a makaumanay ti danom nga aggapu iti P150-M ti balorna a dam gapu ta madlaw a depektibo manen ti nasao a proyekto.
Gapu iti daytoy, ikidkiddaw ti maseknan a grupo a no maituloy ti pannakaaramid iti proyekto ket saan koman a ti dati a construction firm.
Iti naunday a panawen a naglabas, pinarigat ti Zanjera Baranban isuda gapu ta maperperdi ti panagtalonda uray saan pay a naapit ti mulada a pagay iti second cropping season iti lugarda agingga nga ag-third crop-da manen iti pagay ket saanda nga ipalubos a bumaba ti padanom.
Kabayatanna, daytoy a surat ken naiturong ken ni Engr. Joselito De Vera, Officer In Charge ti National Irrigation Administration ken adda mismo pirma dagiti agrekreklamo maipanggep iti daytoy a banag.
