LAOAG CITY – Inbatad ni Mr. Jhon Rey Salud, Federated President North Main Canal Irrigators Association iti ili ti Vintar ken Bacarra nga ado dagiti nakasarsarita da nga aglaklako kadagiti aglaklako ti nagduduma a klase ti peke nga abono.
Segun kenkuana, kiddawenna dagiti aglaklako ti abono no ayanno ti naggapuaananna, dagiti umno a papeles a kasapolan ken ti lisensia.
Kinunana idi kallabes ket adda ti immay naglako kenkuana ti abono ngem saanna a nailawlawag a naitantan ti ilaklakona a produkto.
Inrakurak ni Salud nga adda dagiti sabali pay a brand ti peke nga abono malaksid iti immunana a nasaed iti ili ti Bacarra.
Mainaig iti daytoy, kinanayonna a ballaagan dagiti kakaduana iti North Main Canal nga agbalin a naridam maipanggep kadagiti mailaklako nga abono.
Innayonna, a ti makitkitana a kas rason nga adda dagiti mannalon a gumagatang iti peke nga abono ket gapu ta nalaka daytoy nga amang ngem iti legal nga abono.
Kabayatanna, nagpalagip ni Salud kadagiti padana a mannalon a saan nga agpalpaloko kadagiti makaallilaw a sarita dagiti aglaklako ti peke nga abono ken kasta pay a taripatuenda ti mulada tapnu saanda a malugi.
