LAOAG CITY – Kinumpirmaran ni P/Chief Insp. Roldan Suitos, hepe ti PNP Sarrat nga awan dagiti nakita da nga armado a lallaki a maipagarup a kameng ti New People’s Army iti ili a Sarrat.
Daytoy ket kalpasan nga adda ti naawat da a damag manipud ti kapitan ti Bgry 19 Sto. Thomas iti nasao nga ili babaen ti pannakaawat na met ti nasao a damag.
Segun ti naawat da a report, nakita ti maysa a babai ti grupo dagiti armado a lallaki iti boundary ti Bgry 20 ken ti Brgy 19.
Kuna ni Suitos a dagus da a nagturong iti nasao a lugar tapno kitaen da no pudno ti nasao a report.
Nupay kasta, negatibo ti nasao a report ngem inbaga ni Suitos naiget ti panagmonitor da ti nasao a lugar gapu ta ibilang da a ballaag daytoy.
