LAOAG CITY – Kinastigar ni Senador Win Gatchalian ti National Telecommunications Commission gapu iti pannakapaay daytoy a nangipatungpal kadagiti probision ti SIM registration law a mangitunda ti panagusar dagiti scammers kadagiti nagduduma a Philippine Offshore Gaming Operators.
Inbatad ni Gatchalian nga agtultuloy nga agar-aramid ti aktibidad ti panangallilaw ken scamming ti Philippine Offshore Gaming Operators usar ti sim cards.
Kunana a ti maysa a common denominator kadagiti Philippine Offshore Gaming Operators a naipadalan iti panangtiliw kadagiti otoridad ket ti binulto a SIM card a maus-usar para iti panangluko ken panagaramid ti scam.
Nakita daytoy ti publiko idi in-raid ti Smartweb Technology Corp. iti Pasay City, Zun Yuan Technology iti Bamban, Tarlac ken iti Lucky South 99 a sakupen iti Porac ken Angeles City iti Pampanga.
Iti kaso ti Zun Yuan, naduktalan dagiti otoridad dagiti SIM card nga adda ti biddot iti pakabigbigan pakairamanan dagiti nagduduma a telepono ken dagiti script nga us-usaren iti panag-scam.
Naammoan a dagiti SIM card ket maus-usar iti pannaiwayat ti love scam, cryptocurrency scam ken dadduma pay nga investment scam.
Malaksid kadagiti SIM card, ti naisayangkat a search ken seizure operation iti uneg ti Lucky South 99 ket nagtennag iti pannakaduktal kadagiti nagduduma a phone device, droga ken dagiti torture device.
Innayon ni Gatchalian, ti Republic Act No. 11934 wenno ti SIM Card Registration Act ket nagbalin a linteg a kangrunaan a gagem ket makissayan no saan man a naan-anay a maikkat dagiti scam nga ar-aramiden babaen iti text wenno online messages.
Kabayatanna, sipod a naipatungpal ti linteg idi Oktubre 10, 2022, dagiti aktibidad ti scamming ket ngimmato banag a maisupadi iti ninamnama ti kaadduan a Pilipino.
