LAOAG CITY – Indeklara ti Korte Suprema iti maysa a desision a ti National Telecommunications Commission (NTC) ket saan a makaipabaklay iti singir wenno rate kadagiti kompania ti telecomunication(telco) no saan a suroten ti due process.
Segun iti Second Division ti Korte Suprema nga idauluan ni Senior Associate Justice Marvic Leonen, inlasinna ti bilin ti National Telecommunications Commission a mangibilin kadagiti telco nga usarenda ti six-second-per-pulse billing scheme para kadagiti awag idi 2009.
Sakbay ti nadakamat nga order ti National Telecommunications Commission, singiren dagiti telco dagiti end users-da iti kada minuto a no sadinno no nasurok bassit a maysa a minuto ti awag ket automatiko a masingir kas maysa a minuto.
Pinasingkedan ti Korte Suprema ti desision ti Court of Appeals, a kunkunana a nupay adda pannakabalin ti National Telecommunications Commission a mangregulate, masapul a patas, nainkalintegan, ken naibasar daytoy iti konsultasion ken datos manipud kadagiti panagdengngeg.
