LAOAG CITY – Inpetteng ni Deputy Speaker Ronaldo Puno ken miyembro ti National Unity Party, a masapol a naibasar iti nalawag ken natibker nga ebidensya ti aniaman nga impeachment kontra ken ni Vice President Sara Duterte.
Iti rakurak ni Puno, kuna na a masapol a siguradwen ti House Committee on Justice nga umdas dagiti dokumento ken pammaneknek sakbay nga ipatulod ti kaso iti senado para iti pannakausigna.
Segun kenkuana, kasapulan nga adda ti direkta nga ebidensya no adda ti napasamak a saan nga usto a panangusar ti confidential funds iti opisina ti Bise Presidente ken iti Department of Education.
Innayon na a napateg nga adda ti maipakita a pammaneknek kas kadagiti record manipod iti , Anti-Money Laundering Council a ti pondo ket naikabil iti personal a gamit wenno account ti Bise Presidente wenno dagiti kabagyan na, wenno mangibagi kenkuana.
Inpetteng na a no awan ti kastoy nga ebidensya ket agbotos ti partido da tapno maibasura ti reklamo.
Dinakamat pay ni Puno a masapol a tingitingen a naimbag ti testimonya ti maysa a testigo a nakabalud iti naisina a kaso, gapu ta mabalin nga addaan daytoy ti motibo a mangirakurak ti saan nga usto nga impormasyon.
Iti pakabuklan, inpalgak ti partido a suportaran da laeng ti impeachment complaints kontra iti bise president no adda ti nalawag, dokumentado, ken mapaneknekan nga ebidensya iti panaglabsing.
