LAOAG CITY – Inbatad ni Mr. Francis Castro, taga Bacarra, Ilocos Norte ken nagturpos iti Northwestern University ditoy ciudad ti Laoag a nakaro a pressure ti kangrunaan a kinalaban na iti panageksamen na para iti November 2023 Nurse Licensure Examination isut gapuna a nagbalin nga emosyonal kalpasan a naamoan na a naipasa na ti nasao nga eksaminasyon.
Inlawlawag na a nagturpos iti nadakamat a pagadalan nga addaan ti pammadayaw isut gapuna a dakkel a pressure kenkuana amangan no saan a makapasa iti eksaminasyon.
Gapu iti daytoy, kuna na a tallo laeng dagiti makaammo iti panagturong na iti ciudad ti Baguio tapno ageksamen, karaman ditoy ti ina ken dua a kabsat na.
Segun kenni Castro, ti arapaap na idi ket ti Aeronautics ngem gapu ta dakkel ti magastos ket nangala laengen ti kurso a nursing gapu ta nurse ti ina na ken uray ti lola na karaman ti ikit ken uliteg na.
Inpakaammo na pay a tallo a bolan a nagreview ken nagturong laeng iti ciudad ti Baguio, lima nga aldaw sakbay ti eksaminasyon.
Inadmitir ni Castro a saanna a ninamnama a makapasa gapu iti kinarigat ti eksaminasyon.
Mainaig iti daytoy, kuna na a sakbay ti eksaminasyon ket inbalakad kenkuana ti ina na a saanna a rumbeng nga i-pressure ti bagina.
Inkari ti ina na nga aniaman ti agbalin a resulta ti idadalan na iti nasao nga eksaminasyon ket agtalinaed ti panangipannakkel da kenkuana.
Inpalgak ni Castro a ti immuna a tinawagan na kalpasan a naamoan na a nakapasa ket ti ina na nga agdama nga adda idiay ballasiw taaw no sadinno nga agpada da a nagbalin nga emosyonal gapu iti napalalo a kinaragsak da iti nagun-od na a ballaigi.
Kabayatanna, inbatad ni Castro a plano na ti agserbi paylaeng ditoy probinsya gapu ta maysa isuna kadagiti iskolar ni Governor Matthew Marcos-Manotoc.
