LAOAG CITY – Nagbuluntaryo dagiti dua driver a da Nelson Piñera kenni Ely Cudal ken agpapaay da iti Northwestern University a libre nga itulnog da dagiti health workers iti Mariano Marcos Memorial Hospital and Medical Center iti siudad ti Batac.
Segun kenni Ms. Zsa Zsa Raval, executive assistant ti the president iti NWU, itulnog da Piñera kenni Cudal dagiti health workers kas kadagiti doktor ken nurse usar ti dua a bus ti unibersidad.
Urayen dagiti dua a bus dagiti maseknan nga health workers iti kapitolyo probinsyal iti bigat tapno itulnog da dagitoy iti nasao nga ospital kasta met no agawid dagiti maseknan no malpas ti panagtrabaho da.
Kuna na nga adda met ti umiso a proteksiyon dagiti dua a driver kas iti panagsuot da ti mask ken mausar nga alchohol.
Inbatad ni Raval a pinatgan a dagus ti presidente ti unibersidad ti kiddaw ti MMMH&MC iti pannakaitulnog dagiti health workers nga agserserbi iti ospital.
Dagus a nagbuluntaryo dagiti dua a driver kalpasan ti kinasarita ti presidente dagitoy.
Innayon na a nangrugi ti operasyon dagiti dua a bus ti Northerwestern University idi naiserdeng ti biyahe dagiti pampubliko a lugan.
