LAOAG CITY – Agtultuloy ti panagukkon ti Office of Barangay Affairs wenno OBA iti listaan dagiti sumaruno a mabakunaan kontra COVID-19.
Inbatad ni Mrs. Aleth Claire Policarpio, mangidadaulo ti OBA a daytoy ket basar iti surat surat ni Gob. Matthew Marcos Manotoc kadagiti mayor ken punong barangay.
Inlawlawag na a dagitoy dagiti saan pay a nabakunaan nga opisial ti barangay pakairamanan dagiti volunteer, empleado kadagiti Local Government Units wenno munisipio ken dagiti OFW nga agkasapulan a mabakunaan tapno makasublida iti pagtrabtrabahoanda a pagilian.
Kunana a malaksid kadagitoy ket mannarimaan pay ti pannakailista dagiti “ambulant vendors” nga agsursursur iti nadumaduma a lugar kas paset ti trabahoda.
Kabayatanna, kuna ni Policarpio a dagiti dadduma kas kadagiti kabinbinnulig ti probinsia iti turismo ken dagiti Micro Small and Medium Enterprises ket iti MSME Office ken iti Ilocos Norte Tourism Office ti pakaiyawatan dagiti listaan.
Inpatalged na nga awan ti rumbeng a pagdanagan dagiti kakailian gapu ta libre ti maipaay a bakuna kadagiti maseknan.
