LAOAG CITY – Nagpalagip ken nagballaag ti Office of Civil Defense (OCD) mainaig kadagiti possible a panagtultuloy ti panagngato ti lebel ti danom wenno ti layos kasta met dagiti landslides iti nagduduma a rehiyon iti pagilian.
Sumagmamano kadagiti banbantayan ti Office of the Civil Defense iti agdama ket ti National Capital Region (NCR) gapu iti agtultuloy a pannakalayos ti sumagmamano a lugar iti agdama idinto a naiget met ti panagmonitor ti opisina iti Central ken Northern Luzon kadagiti pangta ti landslides gapu paylaeng iti agtultuloy a panagtudtudo na a gubuay ti bagyo ken abagat.
Segun ken ni Office of Civil Defense Officer-in-Charge Asec. Rafaelito Alejandro IV, saturated unayen ti daga gapu iti sumagmamano a lawas a panagtudtudo na ken iti agdama ket gapu iti epekto ti bagyo Emong ken pinapigsa pay ti abagat isut gapuna a ibalbalakad na kadagiti residente ti naan-anay a panagan-annad ken panagbalin nga alerto.
Basar iti datos ti Mines and Geoscience Bureau (MGB) nasurok a 3 ribo a barangay iti intero a pagilian ti mapagam-amkan a possible a makapasar ti layos ken landslides.
