LAOAG CITY –Balligi a nairugi ti Off-Season Vegetable Derby-Technology Demonstration iti Barangay Lataag ditoy siudad ti Laoag.
Impakaammo ni Engr. Shiela Opelac, ti mangidaulo ti City Agriculture ditoy siudad a daytoy ket paset ti selebrasion ti Nutrition Month tapno itantandudo ti dagiti nasustansia a taraon kangrunaannan ti nateng.
Kunana a ditoy a namulaan ti 0.5 hectares a taltalon iti off-season a nateng kas kuma ti kamatis, tarong, sitaw, ken dadduma pay.
Inlawlawagna a naidumduma daytoy gapu ta naimula dagitoy iti babaen ti nagduduma nga agricultural companies nga usarda dagiti nagduduma a teknolohia iti panagpatanor iti mula a nateng.
Innayon ni Opelac a daytoy a demo farm ket maipaiman ti Lataag Farmers Association a madutokan tapno isuda ti mangmanehar kadaytoy.
Kabayatanna, nakipagpaset met ni Mayor James Bryan Alcid iti panagmula kas suportana ken kunana a dakkel a tulong daytoy nga aktibidad tapno masigurado ti naan-anay a nasustansia a taraon kas kuma ti nateng.
