LAOAG CITY – Naiget a kinondenar ti Office of Civil Defense (OCD) ti panagusar ti Emergency Cell Broadcast System (ECBS) para iti panagkampanya ita a national and local election.
Daytoy ket kalpasan nga adda dagiti naawat a report ti nasao nga opisina nga ado dagiti residente manipod kadagiti probinsya ti makaaw-awat ti kadagiti mensahe a gutgutiguten da dagitoy nga ibotos dagiti partikular a kandidato.
Iti maysa nga statement nga inparuk-at ti Office of Civil Defense, inpetteng ti ahensya a naiget a maipawil ken narisgo ti panagusar ti Emergency Cell Broadcast System kas paset ti panagkampanya dagiti kandidato ita a panawen ti eleksyon.
Segun iti ahensya, ti Emergency Cell Broadcast System ket saan a rumbeng nga us-usaren iti panagkampanya ken para laeng daytoy iti panangipaay kadagiti impormasyon a live-saving alerts tunggal emergencies kas iti gingined, bagyo ken dadduma pay a sitwasyon a mabalin a makaapektar iti seguridad ti publiko.
Ti panangusar daytoy iti political purposes ket mabalin a makaapektar iti panangipaay kadagiti emergency alerts ken mabalin nga agbalin nga imminent threat iti biag dagiti Pilipino.
Kabayatanna, pinalagipan ti ahensya dagiti kandidato a ti Emergency Cell Broadcast System ket maus-usar laeng para kadagiti urgent emergency notifications ken saan da nga usaren kas campaign platform gapu ta mabalin a pangrugyan iti pannakaulaw kangrunaan na no adda dagiti mapasaran a nakaro a krisis iti pagilian.
