LAOAG CITY – Nangipila ita nga aldaw ti Office of the Solicitor General ti quo warranto petition kontra kenni suspended Bamban, Tarlac Mayor Alice Guo a mabalin nga agresulta iti permanente a pannakaikkatna iti puesto na iti gobierno.
Iti petision a naipila iti Manila Regional Trial Court, makita iti umuna a panid a ti nainaganan a respondent ket ni Guo Hua Ping wenno immuna a naamammu kas Alice Leal Guo.
Maipalagip a pinasingkedan met ti National Bureau of Investigation nga agpadpada ti fingerprint da Guo ken Chinese passport holder a ni Guo Hua Ping a mangipakpakita laeng a may maymaysa da.
Idi rugrugi ti bulan Hulio, immunan a nangipila ti Office of the Solicitor General iti petision a mangidawat iti pannakakansela ti birth certificate ni Guo.
Inpetteng pay ni Solicitor General Menardo Guevarra a no makanselar ni Guo ket mapukaw na pay ti napateg a depensa nga iggemna mainaig iti kinasiasinona.
Ngem iti biang ni Guo, namin-adun nga inlibakna dagiti alegasion kontra kenkuana a pakainaiganna iti naraut a Philippine Offshore Gaming Operator hub iti ilina idiay Bamban a karaman iti illegal operasyon.
