LAOAG CITY – Umabot iti P375 million ti confidential expenses ti Office of the Vice President para iti 2023.
Daytoy ti nakailanad iti report ti Commission on Audit (COA).
Inrakurak ti Commission on Audit a ti Extraordinary and Miscellaneous Expenses ti opisina nga idaulwan ni Vice President Sara Duterte iti napalabas a tawen ket umabot iti P483,600.
Naamoan a ti confidential expenses ti Office of the Vice President ket mamintalo a nangatngato no ikompara idi 2022 nga umabot laeng iti P125,000,000.
Ti confidential expenses ket nailista iti babaen ti Maintenance and Other Operating Expenses (MOOE) a pakairamanan ti travelling expenses, gastos para iti training and scholarship, supplies and materials, awards and prizes, professional services, repairs and maintenance, ken dadduma pay.
Kabayatanna, ti Office of the Vice President ket nakagastos ti agarop P1.2 billion iti Maintenance and Other Operating Expenses idi 2023.
