LAOAG CITY – Inlawlawag ni Mr. Dominador Alberto, Officer In Charge – Consumer Protection Division, Department of Trade and Industry maipapan iti Republic Act No. 9994 wenno dagiti benepisio ken karebbengan dagiti senior citizens.
Segun kenkuana, ti akin-hurisdiksion daytoy ket ti Office of the Senior Citizens Affairs ken ti baro nga opisina a National Commission on Senior Citizens no sadino dagitoy mismo ti mangipatpatungpal ti nasao a linteg.
Nupay kasta, kunana awaten ken akomodaren latta ti Department of Trade and Industry dagiti reklamo manipod kadagiti maseknan nga agreklamo ngem iyendorsoda kadagiti maseknan a pangopisinaan ken ahensia ti gobierno.
Inbatadna nga addan dagiti sumagmamano a reklamo a naawatda iti nasao a banag iti napalabas a tawen.
Inlawlawagna a dagiti establishimento a saan a sumurot iti paglintegan ket posible a mapilaan dagitoy ti reklamo iti Korte nga isu ti agdesision no ania ti addang a maaramid ken maipataw a pannusa.
Kabayatanna, kuna ni Alberto nga adda ti 5 a porsiento a diskuento para kadagiti senior citizens kas iti nailanad iti Republic Act No. 7581 para iti basic necessities and prime commodities pakairamanan dagiti bagas, mais, tinapay, fresh and dried fish, karne ti baboy, itlog, noodles, prutas, nateng ken dadduma pay.
