LAOAG CITY – Iyur-uray ti Governor Roque Ablan Senior Memorial Hospital ditoy siudad ti Laoag ti official report manipod iti Senior House Officer seknan ti maipagarup a pannakadiscriminate dagiti agayan-ayat.
Daytoy ket seknan iti panagpaagas kuma da Louther Ceredon kenni Junah Joyce Ulao, iti GRASMH, kalpasan a nadesgrasya da, ngem maipagarup a nagkedked dagiti sumagmamano a nurse kalpasan a naamuan da nga empleyado dagitoy iti Alorica.
Segun kenni Dr. Walbert Samonte, officer-in-charge iti nasao nga ospital, manamnama a maipaima kadakuada ita nga aldaw ti official incident report a nakaipalaonan ti fact findings iti napasamak.
Saan pay nga ammo ni Dr. Samonte ti nagan dagiti maitudtudo a nurse a maipagarup a nang-discriminate kadagiti aggayan-ayat nga agtrabtrabaho iti nasao a kompanya.
No bilang mapaneknekan nga adda ti nagliwayan dagiti maseknan ket sumango ti maiyannatop a pannusa.
Iti nasao a kompanya, nakaimaldit dagiti sumagmamano nga empleyado a nagpositibo iti COVID-19 iti kallabes.
